యాచారం రోడ్డు పనులు అర్ధాంతరంగా
కంకర పోసి వదిలేయడంతో వాహనదారులకు ఇబ్బందులు
యాచారం (మన దిశ ): మండలంలోని గాండ్లగూడెం నుంచి మల్కిజ్గూడ మీదుగా మేడిపల్లి వరకు చేపట్టిన రోడ్డు వెడల్పు పనులు అర్ధాంతరంగా నిలిచిపోయాయి. రోడ్డు పనుల్లో భాగంగా కొన్ని ప్రాంతాల్లో పనులు చేపట్టి పూర్తి చేయగా, మరికొన్ని చోట్ల కంకర పోసి వదిలేయడంతో వాహనదారులు, ప్రయాణికులు తీవ్ర ఇబ్బందులు ఎదుర్కొంటున్నారు.
రోడ్డుపై కంకర తేలి ఉండటంతో ద్విచక్ర వాహనదారులు, ఆటోలు, ఇతర వాహనాల రాకపోకలకు ఇబ్బందులు ఏర్పడుతున్నాయి. కంకరపై వాహనాలు ప్రయాణించడంతో దుమ్ము, ధూళి ఎగిసి పరిసర ప్రాంతాల ప్రజలు ఇబ్బందులు పడుతున్నారు. రోడ్డు పనులు ఎప్పుడు పూర్తవుతాయో తెలియక స్థానికులు ఆందోళన వ్యక్తం చేస్తున్నారు.
రెండు బ్రిడ్జిల నిర్మాణం కూడా కొనసాగింపు
మేడిపల్లి సమీపంలో రెండు బ్రిడ్జిల నిర్మాణ పనులు కూడా కొనసాగుతున్నాయి. బ్రిడ్జిల పనులు, రోడ్డు వెడల్పు పనులు పూర్తికాకపోవడంతో ఈ మార్గంలో ప్రయాణించే ప్రజలకు ఇబ్బందులు తప్పడం లేదు. ముఖ్యంగా రాత్రి వేళల్లో రోడ్డు పరిస్థితి ప్రమాదకరంగా మారే అవకాశం ఉందని వాహనదారులు చెబుతున్నారు.
పనులు వేగవంతం చేయాలని డిమాండ్‌
రోడ్డు వెడల్పు పనులను ప్రారంభించి మధ్యలో నిలిపివేయకుండా త్వరితగతిన పూర్తి చేయాలని స్థానికులు కోరుతున్నారు. కంకర పోసిన ప్రాంతాల్లో వెంటనే బీటీ పనులు చేపట్టి రహదారిని అందుబాటులోకి తీసుకురావాలని, బ్రిడ్జిల నిర్మాణాన్ని కూడా వేగవంతం చేయాలని విజ్ఞప్తి చేస్తున్నారు. సంబంధిత అధికారులు స్పందించి సమస్యను పరిష్కరించి, ప్రజలకు సురక్షితమైన రహదారి సౌకర్యం కల్పించాలని వాహనదారులు, ప్రయాణికులు కోరుతున్నారు.
