ప్రభుత్వ ఆసుపత్రిలో పరిశుభ్రతకు శ్రీకారం
ఎలిమినేడు ప్రభుత్వ ఆసుపత్రి ఆవరణలో ఎన్ఎస్ఎస్ విద్యార్థుల సేవా కార్యక్రమం
పరిశుభ్రతపై ప్రజలకు అవగాహన కల్పించిన విద్యార్థులు
ఇబ్రహీంపట్నం:పరిశుభ్రమైన పరిసరాలతోనే ఆరోగ్యకరమైన సమాజాన్ని నిర్మించవచ్చని చాటి చెబుతూ ఎన్ఎస్ఎస్ విద్యార్థులు సేవా కార్యక్రమాన్ని నిర్వహించారు. ఇబ్రహీంపట్నం నియోజకవర్గం ఆదిభట్ల మున్సిపాలిటీ పరిధిలోని మంగళపల్లి పటేల్‌గూడ సమీపంలో ఉన్న విశ్వేశ్వరయ్య కళాశాలకు చెందిన ఎన్ఎస్ఎస్ విభాగం విద్యార్థులు ఎలిమినేడు గ్రామంలోని ప్రభుత్వ ఆసుపత్రిలో పరిసరాల పరిశుభ్రత కార్యక్రమాన్ని చేపట్టారు.
ఈ సందర్భంగా విద్యార్థులు పెద్ద సంఖ్యలో పాల్గొని ఆసుపత్రి ఆవరణలో పేరుకుపోయిన చెత్తాచెదారం, వ్యర్థాలను తొలగించారు. ఆసుపత్రి పరిసరాలను శుభ్రపరిచి పరిశుభ్రమైన వాతావరణాన్ని కల్పించేందుకు తమ వంతు కృషి చేశారు. ఆసుపత్రికి వచ్చే రోగులు, వారి సహాయకులు పరిశుభ్రతను పాటించేలా అవగాహన కల్పించారు.
పరిశుభ్రత అనేది ఒక్కరోజు కార్యక్రమం కాకుండా నిరంతరం కొనసాగాల్సిన సామాజిక బాధ్యత అని విద్యార్థులు పేర్కొన్నారు. ఆసుపత్రి పరిసరాలను శుభ్రంగా ఉంచడంతో పాటు చెత్తను ఎక్కడపడితే అక్కడ వేయకుండా, తడి-పొడి చెత్తను వేర్వేరుగా నిర్వహించాల్సిన అవసరాన్ని వివరించారు. ప్రజారోగ్య పరిరక్షణలో పరిశుభ్రమైన పరిసరాల పాత్ర ఎంతో కీలకమని తెలిపారు.
ఎన్ఎస్ఎస్ విభాగం ఆధ్వర్యంలో విద్యార్థులు చేపట్టిన ఈ సేవా కార్యక్రమాన్ని ఆసుపత్రి సిబ్బంది అభినందించారు. విద్యార్థులు సమాజ సేవా కార్యక్రమాల్లో చురుకుగా పాల్గొనడం అభినందనీయమని పేర్కొన్నారు. యువతలో సామాజిక బాధ్యతను పెంపొందించేందుకు ఇలాంటి కార్యక్రమాలు దోహదపడతాయని తెలిపారు.
ఈ కార్యక్రమంలో మెడికల్ ఆఫీసర్ మోహన్, సంతోష్, ఆసుపత్రి సిబ్బంది, ఎన్ఎస్ఎస్ విభాగానికి చెందిన విద్యార్థులు తదితరులు పాల్గొన్నారు.
